Eruzione del 1631

1631. La Montagna
(il racconto di un testimone)

Arbanne juorno
dapò tre jurnate de tremmiti
sta negra storia accumminciaie,
era nu marterì a sirece de dicembre,
frammente che ‘nta parule de Calastro
jevo cuglienno vruoccole e turzelle
pe’ farene menesta ammaretata.
cu nnoglia e tracchiulelle
e vucculare ‘i puorco.

Antrasatta nu pennacchio
‘nfino addo’ se sperde a vista
niro cummo a sprufunno ‘i puzzo
ra ‘ncoppa a la muntagna ditta Somma,
auto l’aggio visto che se spanneva
‘ncurzera cummigliando lu cielo
e lu sole annascunnenno
che notte già parea
e era juorno.

Tronole de la muntagna
comme a trubbeja de primmavera
e chioppeta de cennere e viento ‘i fuoco.
Siente mo’ che paura ‘ncuollo ce carette,
dapò ca cupa e trista sunaro vintunora,
quanno a lu calare friddo de la sera
sajette rosse e de fuoco mazzacani
cumme a palle de pommarde
ce vulavano ncoppa li cape
pe ghire a sprufunnarse
dint’ a lu mare.

Maronna mia,
orabbronobbis peccaturi,
pe tutta la nuttata sana sana
triemmiti ra muntagna e schianti
cumme si a ruina lu munno jesse
e scarrupamienti de case
e arberi sguarrati.

Eruzione del 1631

Juorno facette
chiajetato e spantecato
ma ‘nta tanto nu scurore
cumme si fosse ancora notta futa
senza vere’ chiarore e lenza de cielo
annegrecuto cumme pe l’ombre de la notte
‘nta nu sprufunno friddo de nera neglia.
E lu mare se facette de cravone
apparo a gnostra riavulesca
cumme si pur’isso
appaurato se scetasse
alla putenza animalesca
de la cummara muntagna
e chiù e chiù vote s’arreterave
sceppanne e strascenanne appriesso
varche e ardegni de li piscaturi,
cumme a vufera arreturnave
e cavalluni arravuglianne
pisci, purpi e seccetelle
spannea sparpetianno
‘ncoppa a li chiane.

A la terza jurnata surgente,
pe ghionta de ruotolo a sti trivuli,
sciorta mia nesca e negrecata,
s’arapettero li llancelle.
Nu delluvio de l’univierzo,
e nu spruposito de chioppeta
e na sciummara de lota e zuzzimma
carca d’arbori, sradecati e nturcinati
e carogne de bestie scapezzate o
da neglia e mufete strafucate,
de stu Casale de la Torre
subbisaie case e parule
e lu mare se seccaie.

1631. La Muntagna. (il racconto di un testimone).
il racconto di un testimone).
Divagazione immaginaria di un ipotetico racconto fatto da un parulano torrese dell’epoca.

Eruzione del 1631

Pag.7